2004 yilning 13 avgust kuni qadimiy Afina shahrida XXVIII Yozgi Olimpiada o‘yinlariga start beriladi. Quyida sayyoramiz miqyosidagi yirik sport tadbiri haqidagi ayrim qiziqarli raqam va ma’lumotlarni e’tiboringizga havola etamiz.
• Dastlabki Olimpiada o‘yinlari Gretsiya tuprog‘ida miloddan avvalgi 776 yilda o‘tkazilgan.
• Afina shahri zamonaviy tarixda ikkinchi bor Olimpiada bahslariga mezbonlik qilmoqda. Gretsiya poytaxtida birinchi bo‘lib 1896 yilda ulkan sport bayrami tantana qilingan.
• Afina Olimpiada o‘yinlariga mezbonlik huquqini 1997 yilning 5 sentyabrida qo‘lga kiritgan. Dunyoning eng qadimiy madaniyat o‘choqlaridan biri bo‘lgan shahar tanlov jarayonida Buenos-Ayres, Keyptaun, Stokgolm kabi shaharlarni «o‘yin»dan chiqarib yuborgan. So‘nggi ovoz berishda esa Rim shahri 66:41 hisobida g‘alabani boy bergan va «uloq» Afinaga nasib etgan.
• Olimpiada o‘yinlari 16 kun (13-29 avgust) davom etadi. Unda 10500 sportchi va 202 mamlakatdan tashrif buyurgan 3000 dan ziyod rasmiy vakil ishtirok etadi.
• 38 ta sport maydonlarida 28 sport turi bo‘yicha bahslar bo‘lib o‘tadi.
• O‘yinlarni 21500 jurnalist yoritib boradi.
• Olimpiada bahsi tinch-osoyishta o‘tishi uchun 45 ming tartib posboni tunu kun xizmatda bo‘ladi. Mehmonlar va ishtirokchilarga dunyoning turli mamlakatlaridan kelgan 60 mingdan oshiq ko‘ngilli yordam ko‘rsatadi.
• Homiylar va musobaqalarni translyatsiya qiladigan ommaviy axborot vositalari tomonidan Afinaga 1 mlrd. dollar mablag‘ to‘lanadi. Bu Olimpiala umumiy byudjetining 60 foizi demakdir. Byudjetning qolgan qismi chipta va litsenziya savdosidan qoplanadi.
• Afg‘oniston ko‘p yillik tanaffusdan keyin Olimpiada oilasiga qaytmoqda. Mamlakatda toliblar hukmron bo‘lgan davrda sportga umuman e’tibor berilmagan va ayrim o‘yinlar taqiqlab qo‘yilgandi.
• Olimpiada madhiyasi Londonda istiqomat qilayotgan, aslida gretsiyalik Jorj Maykl (Georgios Kiriakos) tomonidan yozilgan.
• Feb va Afina talismani 28-Olimpiada o‘yinlarining ramzidir. Talisman qadimgi yunon afsonalari ta’sirida yaratilgan (Dastlabki talisman 1968 yilgi Qishki Olimpiada bahslarida joriy etilgan edi).
• Tashqi ko‘rinishi zaytun yaprog‘ini eslatuvchi Olimpiada mash’alasi hajmi 68 sm, og‘irligi 700 gr.ni tashkil etadi.
• Afina Olimpiadasi emblemasida zaytun chambaragi aks etgan. Zaytun daraxti greklar e’tiqodicha, muqaddas daraxt hisoblanadi. Qadimda Olimpiada chempionlari ham zaytun daraxti shoxidan yasalgan gulchambar bilan taqdirlanganlar.
